Светскиот ден на аудиовизуелно наследство во Кинотека на Македонија

Кинотеката на Македонија денеска го слави Светскиот ден на аудиовизуелното наследство и во чест на мотото на оваа глобална манифестација „Вашиот прозорец кон светот“, ги отвора своите работни простории и депоа за студентите, учениците, колегите од сродните институции, како и за љубопитните граѓани.

Со промоција на книгата „Антонио Митрикески: Хроника на еден филмски сон“ денеска во 12 часот во Кинотеката беше започнато одбележувањето на Светскиот ден на аудио-визуелното наследство. Книгата е комбинација од монографија, биографија, мемоарска проза и критички осврти. Книгата е издание на Кинотеката, а автор е Стојан Синадинов.

Одбележувањето на Светскиот ден на аудио-визуелното наследство го започна УНЕСКО, а потоа го прифатија меѓународните тела што обединуваат организации и асоцијации на филмски архиви, музеи и институции што се занимаваат со заштита и чување на аудио-визуелното наследство.

Тие се предводени од Координативниот совет на здруженијата на аудио-визуелни архиви (CCAAA – Coordinating Council of Audiovisual Archives Associations).

Аудиовизуелни архиви од цел свет на 27 октомври на различни начини го одбележуваат овој ден-паметник преку организација на различни настани, проекции, изложби, дискусии за да ја подигнат јавната свест за ранливоста на аудиовизуелните материјали и нивното значење за колективната меморија.