Јубилејно 20 издание на ОФФ Фест, мелем за фестивалските сладокусци

Јубилејното 20 издание на фестивалот ОФФ-Фест ќе се одржи од 9 до 13 ноемри. Планирани се 5 концерти и проекција на документарен филм.

Фестивалот на 9 ноември во 20 часот, во Македонската опера и балет, ќе го отвори извонредното португалско/шпанско дуо „Lina_Raül Refree“, кое изведува осовремена и надградена фадо музика. А, претходно од 18 часот во МКЦ- кино Фросина, сеќавањата на големата португалска пејачка легенда на фадо, Amália Rodrigues (1920-1999), ќе бидат освежени со проекцијата на документарниот филм „The Art of Amalia”.

Мистичниот минимализам, имагинарниот фолк и нескротливата музичка фантазија и вештина на словенечкото трио „Širom“, во комбинација со апокалиптичната самба на извонредниот гитарист/композитор и еден од најзначајните експоненти на современата бразилска музика Kiko Dinucci, ветуваат, на 11 ноември во МОБ, исклучително концертно доживување од највисок ранг. A, на 13 ноември, исто така во НОБ , величествената моќ на еден од најинвентивните и најоригиналните африкански автори Blick Bassy (Камерун / Франција), ќе ја пресретне неодоливиот шарм, визија и поезија на нашиот „ Пијан Славеј“, новиот проект на Бранислав Николов – фронтменот на „Фолтин“.

Влезниците за ОФФ-Фест се веќе достапни, во строго ограничен број, на билетарницата на МОБ и на mktickets.mk.
Сите концерти на годинешниоте ОФФ-Фест ќе бидат одржани во Македонската опера и балет.

OFFest стартуваше во 2002 година, како втор фестивал кој се издигна од долгогодишната традиција на Скопскиот џез фестивал. Идејата беше да се создаде уште еден значаен музички настан, во различен период од годината и жанровски пошироко ориентиран. Иницирањето на OFFest се наметна како природен чин во ерата на глобализацијата, којашто резултираше со подигнување на креативноста, популарноста и свесноста за таканаречената „музика на светот“. OFFest ја доловува разновидноста на музиката од сите континенти, фокусирајќи се на одделни категории: од традиционалната, етно, фолк и изворна музика сè до современите, урбани и експериментални музички струења.