Од Левица не гласале за Законот за финансирање полтички партии

По вчерашното изгласување на Законот за финансирање политички партии во Собранието со поддршка на опозицијата, пред малку се огласи Левица. Оттаму велат дека пратениците на Левица се единствените кои, на вчерашната собраниска седница, не гласале за измена и дополнување на Законот за финансирање политички партии.

Со измените партиите си овозможуваат да им се вратат назад парите кои им беа скратени со уредба со законска сила пролетва оваа година поради пандемијата. Односно со измените на законското решение практично пратениците гласаат за враќање на околу 4 милиони евра кон нивните матични партии.

Оваа година, поради ковид-кризата, наместо 0,15 проценти од буџетот, политичките партии добија само 0,04 отсто, или наместо 320 милиони денари, со Уредбата со законска сила им беа исплатени само 71.480.556 денари (1,16 милиони евра) пред парламентарните избори.