Кратко траеше „слободата“ во Данска: Повторно се воведуваат КОВИД-рестрикции!

По речиси два месеци без никакви епидемиолошки мерки, Владата на Данска реши повторно да воведе ковид-потврди поради наглото зголемување на бројот на заразените.

Тимот за следење на епидемијата ни препорача ковидот да го класифицираме како болест што му се заканува на општеството и повторно да ги воведеме пропусниците, и Владата тоа ќе го почитува – рече премиерката Мете Фредериксен на конференцијата за новинарите.

На крајот на минатата недела здравствените власти предупредија за опасноста од преоптовареност на болниците поради ковидот, грипот и други заразни болести. Вчера во Данска петти ден по ред имаше повеќе од 2.000 новозаразени, а 36 заболени се на интензивна нега.

Со ковид-пропусницата може да се живее. Таа ви овозможува да бидете мирни кога одите во кино или на концерт. Нивното повторно воведување ќе им го искомплицира секојдневието на тие што не се вакцинирани, а мислам дека така и треба да биде – кажа премиерката.

Ковид-пропусниците во Данска првпат беа воведени пролетта, а беа укинати на 10 септември, кога дневниот број на заразените беше четири пати помал отколку сега.

Во Данска 85,9 отсто од повозрасните од 12 години примиле две дози од вакцината. Повторното воведување на корона-пасошот во Данска ќе значи дека гастрономијата и одредени манифестации ќе им бидат достапни само на вакцинираните, оздравените или лицата со негативен тест.