Владата прогласи енергетска криза, РЕК Битола само со еден блок вратен во функција

Енергетската криза тропа на вратите на македонските домови, енергетската состојба во земјава е критична, а така е бидејќи се направени бројни пропусти во изминатиот период – велат експертите. Ваквата ситуација во Европа се навестувала уште во април и мај, а според сите параметри порблем е и „незнаењето“ при водењето на енергетскиот сектор. Во јавноста веќе има стравувања од рестрикции и зголемување на сметките за струја, но македонските власти уверуваат дека рестрикции нема да има, а дека сметките ќе останат исти до крајот на годината.

На целокупната состојба се надоврза и хаваријата во РЕК Битола кога речиси 24 часа централата беше комплентно исклучена и не поризведе ниту еден киловат откако Блокот 1, едниствениот кој работеше, мораше да биде исклучен заради поправка на дефект, пукната цевка во котелот. Првиот Блок на РЕК Битола повторно е во функција, произведува струја и е приклучен на енергетската мрежа, соопштија од раководството на Комбинатот.

Од ЕСМ најавуваат дека до крајот на неделава треба да заврши ремонтот во Блок 2, кој бил плански, и тој да биде ставен во погон и да почне да произведува струја за домаќинстава. Блок 3 по петочната хаварија ќе биде во погон најмалку еден месец.

ТЕЦ Осломеј не е во функција, и таму се врши ремонт, и истовремено се чека на јагленот од Косово без кој не може да се рестартира. ТЕЦ Неготино чека мазут од државата за да ги вклучи двата блока чиј капацитет е 180 мегавати.

Со оглед на фактот дека домашните капацитети се десеткувани и произведуваат далеку под минималните потреби на домаќинствата ЕСМ во изминативе неколку дена од берзите купи 31 илјада гигавати струја за 6,5 милиони евра

Министерот за економија Крешник Бектеши минатата недела рече дека енергетската кризна состојба ќе ја прогласат поради големите ценовни шокови на берзите за струја и за да може Владата директно да вбризга средства во буџетот во ЕСМ и МЕПСО за да се зголеми нивната ликвидност.

„Од Министерството за економија се обезбедени околу 100 милиони евра за да може да се интервенира во овие две компании за да може МЕПСО да ги покрие долговите кои ги има, а ЕСМ да обезбеди јаглен за производство на електрична енергија“, рече Бектеши.

Од АД ЕСМ посочија дека струја за домаќинствата има и дека компанијата во целост ги испорачува потребните количини на електрична енергија кон универзалниот снабдувач за домаќинствата ЕВН Хоум.