Претставен предлог буџетот за 2022 година, ќе има ли кој да го изгласа?

Фатмир Бесими, министер за Финансии, го презентираше предлог-буџетот за 2022 година, кој пак Владата го донела за време на изборниот молк од вториот круг од локалните избори.

Со новите предвидувања расходната страна на државната каса за 2022 година е планирана на 4,4 милијарди евра и овој износ е за 1,4 проценти поголем отколку во 2021 година. Во Буџетот, во текот на наредната година се предвидуваат да се соберат 3,9 милијарди евра, или 7,4 проценти повеќе од приходот проектиран за годинава. Овие податоци ги соопшти министерот за финасии Фатмир Бесими на прес конференцијата која е во тек, а се однесуваат на Предлог-буџетот за 2022.

Буџетот се прави како дел од една среднорочна рамка во која дел е фискалната консолидација. Во тие рамки во расходите се намалени тековните расходи. Буџетскиот дефицит е 541 милиони евра и како што потенцираше Бесими, тој ќе се користи исклучиво за капитални расходи.

Капиталните расходи се 37,8 милијарди денари, а буџетскиот дефицит е 33,3 милијарди денари. Како што може да се види, буџетскиот дефицит е помал од капиталнит расходи. Тоа е златното правило во јавните финасии што го прави овој буџет развоен и според теоријата и во пракса – рече Бесими.

Тој потенцираше дека идната година економскиот раст е планиран на 4,6 проценти, а инфлацијата на 2,4 проценти, односно се очекуваа таа да се стабилизира и во вториот квартал од наредната година да има релаксирање на цените.

Бесими најави и поголеми плати за здравствените работници, во износ од 5 отсто, односно, како што објасни тоа што годинава го добивале како бонус кој бил обезбеден преку кредит од Светската банка, во наредната година ќе се трансформира во редовни зголемени плати, за што се предвидени буџетски средства.

Инаку, идната година треба да вратиме 11,6 милијарди денари, односно 188 милиони евра, и тоа 6,5 милијарди денари кон надворешни кредитори и 5,5 милијарди денари кон домашни инвеститори.

Министерот ги претстави и новите извори на финансирање: развојна, зелена, проектна обврзница и обврзница индицирана со инфлација. Во Собранието веќе се појавија стравувања дали ќе се донесе Буџетот за 2022 година, сега кога е извесно дека ќе падне Владата, а партиите и Собранието ќе се занимаваат со преговори за обезбедување мнозинство, со гласање нова Влада.