„ПОЦ“ во општина Центар покрај паркирањето ќе ги уредува и чисти јавните површини

Ќе добие ли општина Центар ефикасна комунална служба со најавата за префлање на надлежностите за комунално одржување на општината во рацете на Јавното претпријатие„Паркинзи Општина Центар“ (ПОЦ)? Со ваквата најава ПОЦ покрај одржување на паркиралиштата и казнување за неправилно паркирање, ќе ги чисти и мете улиците, парковите и плоштадите низ Центар. Од новата општинска администрација на чие чело е градоначалникот од СДСМ, Горан Герасимовски, велат дека веќе течат консултациите со директрот на ПОЦ Васко Кичевски за првичните постапки кои треба да се направат во претпријатието, за да се одвои и зајакне секторот јавна хигиена во посебен нов сектор.

Првично, треба да се дефинира новата структура на претпријатието и постапките за префрлање на хигиеничарите кои се вработени и механизацијата во ПОЦ. Потоа ќе се направи структура за потребните одделенија, број на координатори, поделба на општината на реони и проценка на потребните капацитети. Со ваков пристап, ќе бидеме сигурни дека ќе располагаме со доволно ресурси и прецизен план на работа за да ја одржуваме општината чиста. Анализата за структурата на новиот сектор ќе започне да се прави наредната недела, а по одлука на Советот ќе се започне со нејзино спроведување – вели градоначалникот Герасимовски, и додава дека очекува тоа да профункционира наредната година откако ќе се предвиди буџет за дополнителната дејност.

За успешно функционирање на претпријатието потребно е да се набави и соодветна механизација. До крајот на февруари треба да се набави нова цистерна за чистење на улиците, а ќе се набават и три метларки и дополнително една помала за чистење на пешачките зони.

Герасимовски вели дека ќе се формираат и таканаречени маалски патроли, кои ќе бидат задолжени за грижа и заштита од уништување на јавното добро и урбаната опрема. Со проширување на дејноста на ПОЦ во комунално претпријатие, општината ќе обезбеди чисти улици и паркови секаде и во секое време. За јавната хигиена Герасимовски во кампањата исто така најави и „маалски патроли“ кои ќе бидат задолжени за грижа и заштита од уништување на јавното добро и урбаната опрема.